සමාජ මාධ්ය ජාලාවල පළවන තොරතුරුවල සත්ය අසත්යතාව සහ ඒවායේ පසුබිම පිළිබඳව දැඩි ලෙස සොයා බැලීමෙන් පසුව පමණක් ඒවාට කැමැත්ත ප්රකාශ කිරීම (Like) හෝ හුවමාරු කර ගැනීම (Share) කළ යුතුය. සමාජ මාධ්යවල පළවන සෑම දෙයක්ම අන්ධ ලෙස විශ්වාස කිරීම හේතුවෙන් සමාජය තුළ බොහෝ අහිතකර ප්රතිඵල ඇති වන බව උතුරු පළාත් ගරු ආණ්ඩුකාර නා. වේදනායගම් මහතා පැවසීය.
‘සමාජ එකමුතුව උදෙසා වගකීම්සහගත ඩිජිටල් සමාජයක්’ යන තේමාව යටතේ, යුනිසෙෆ් (UNICEF) ආයතනයේ අනුග්රහය ඇතිව ‘සොන්ඩ්’ (SOND) සංවිධානය විසින් සංවිධානය කරන ලද උතුරු පළාත් තරුණ හා ළමා සහභාගිත්වය වෙනුවෙන් උපහාර පිදීමේ විශේෂ උත්සවය අද (2026.05.28) බ්රහස්පතින්දා පූර්වභාගයේදී චාවකච්චේරි නගර සභා ශාලාවේදී උත්කර්ෂවත් අන්දමින් පැවැත්විණි.
මෙම උත්සවයට ප්රධාන අමුත්තා ලෙස සහභාගී වෙමින් අදහස් දක්වද්දී ආණ්ඩුකාරවරයා ඉහත අදහස් ප්රකාශ කළේය.
එහිදී තවදුරටත් අදහස් දැක්වූ ආණ්ඩුකාරවරයා “සමාජය කෙරෙහි දැඩි බලපෑමක් එල්ල කරන ප්රධාන මාධ්යය බවට සමාජ මාධ්ය ජාලා පත්ව ඇති මෙවන් වකවානුවක, මෙවැනි දැනුවත් කිරීමේ වැඩසටහනක් සංවිධානය කිරීම බෙහෙවින් අගය කළ යුත්තකි. මීට දින කිහිපයකට පෙර, උතුරු පළාතේ වෙසක් උත්සව සැමරීම ආණ්ඩුකාරවරයා විසින් තහනම් කර ඇති බවට දකුණේ සමාජ මාධ්ය ඔස්සේ සැලසුම්සහගත අසත්ය පුවතක් ප්රචාරය කර තිබුණි. සමාජයන් අතර වෛරය නිර්මාණය කිරීමේ නින්දිත චේතනාවෙන් යුතුව මෙම අසත්ය පුවත් ඉතා වේගයෙන් හුවමාරු කරගෙන තිබුණි. මේ සම්බන්ධයෙන් මම අපරාධ පරීක්ෂණ දෙපාර්තමේන්තුවට (CID) නිල වශයෙන් පැමිණිල්ලක් ඉදිරිපත් කර ඇත්තෙමි. අප නොකී, නොකළ දේවල් පවා කිසියම් අවශ්යතාවක් උදෙසා මෙලෙස සමාජය තුළ ප්රචාරය කරනු ලබයි.
ඔබ සමාජ විරෝධී ක්රියාවලට එරෙහිව හඬ නැඟුවහොත්, සමාජ මාධ්ය හරහා ඔබට මඩ ගැසීමට ඔවුන් කටයුතු කරනු ඇත. ඔබ ගැන අසත්ය තොරතුරු පතුරුවා හරිමින්, ඔබේ කීර්ති නාමයට හානි කිරීමට ඔවුහු උත්සාහ කරති. අනෙක් අතට, ඔබ සමාජ විරෝධී ක්රියාවලට අනුබල දුන්නොත් ඔවුන් ඔබව හිස මුදුනේ තබා ගනු ඇත. අවාසනාවකට මෙන්, වර්තමානයේ සමාජ විරෝධී ක්රියාවල නිරත වන්නන් වඩාත් බලවතුන් බවට පත්ව සිටිති. ඔවුහු බොහෝ පිරිසක් යොදවා ගනිමින් තමන්ට වාසිදායක ලෙස සමාජ මාධ්ය හසුරුවමින් සිටිති.
එබැවින්, සමාජ මාධ්ය හරහා ප්රචාරය වන කරුණු පිළිබඳව තරුණ පරපුර පමණක් නොව, සැවොම දැඩි අවධානයකින් යුතුව කටයුතු කළ යුතුය. තොරතුරක් හුවමාරු කර ගන්නා විට, එහි සත්යතාව හෝ එය කුමන අරමුණක් සඳහා හුවමාරු කර ගන්නේද යන්න පිළිබඳව අනිවාර්යයෙන්ම සොයා බැලිය යුතුය. අප අනුගමනය කරන (Follow) හෝ කැමැත්ත ප්රකාශ කරන (Like) සමාජ මාධ්ය සටහනක් සැබෑ එකක්ද යන්න පිළිබඳව කිහිප වරක්ම සිතා බැලීම අත්යවශ්ය වේ.” යැයි ආණ්ඩුකාරවරයා අවධාරණය කළේය.
මෙම උත්සවයේදී ව්යාපෘති නිලධාරීන් සහ පුහුණුකරුවන් ඉටුකළ විශිෂ්ට සේවය අගය කරමින් ගරු ආණ්ඩුකාරතුමා විසින් සහතික පත්ර ප්රදානය කර උපහාර පුද කරනු ලැබීය.
මෙම අවස්ථාවට උතුරු පළාත් අධ්යාපන අමාත්යාංශයේ ලේකම් එම්. පැට්රික් ඩිරන්ජන්, ‘සොන්ඩ්’ සංවිධානයේ විධායක අධ්යක්ෂ එස්. සෙන්දූරාසා, යුනිසෙෆ් ආයතනයේ ළමා ආරක්ෂක නිලධාරිනී ශර්මිලි සතීස් මහත්මිය, යාපනය විශ්වවිද්යාල විද්යාලයේ ජ්යෙෂ්ඨ කථිකාචාර්ය ආචාර්ය කේ. ෂන්මුගනාදන්, වවුනියාව විශ්වවිද්යාලයේ කුලපති මහාචාර්ය එස්. මෝහනදාස්, යාපනය විශ්වවිද්යාලයේ ජ්යෙෂ්ඨ කථිකාචාර්ය එම්. ගජවින්දන් ඇතුළු ප්රභූන් රැසක් මෙන්ම සිසුන් සහ තරුණ තරුණියන් විශාල පිරිසක් සහභාගී වූහ
