ඩෙල්ෆ් (නෙඩුන්තීවූ) ප්රදේශයේ සේවය කරන නිලධාරීන් සඳහා දැනට ලබාදෙන අවදානම් දීමනාව ඉහළ නංවන ලෙස උතුරු පළාත් ගරු ආණ්ඩුකාර නා. වේදනායගන් මහතා ඉල්ලීමක් කර තිබේ.
රාජ්ය පරිපාලන, ස්වදේශ කටයුතු, පළාත් සභා හා පළාත් පාලන අමාත්ය මහාචාර්ය චන්දන අබේරත්න මහතාගේ උපදේශක සහ හිටපු ජ්යෙෂ්ඨ පරිපාලන නිලධාරියෙකු වන අශෝක පීරිස් මහතා සහ උතුරු පළාත් ගරු ආණ්ඩුකාරතුමා අතර විශේෂ සාකච්ඡාවක් අද (24.04.2026) සිකුරාදා පස්වරුවේ ආණ්ඩුකාර ලේකම් කාර්යාලයේදී පැවැත්විණි.
එහිදී සාකච්ඡා වූ ප්රධාන කරුණු පහත පරිදි වේ:
ඩෙල්ෆ් දූපතේ සේවය කරන සේවකයින් සඳහා දැනට රාජ්ය පරිපාලන අමාත්යාංශයේ අනුමැතිය ඇතිව රුපියල් 5,000ක අවදානම් දීමනාවක් ලබා දෙනු ලැබේ. වත්මන් ආර්ථික තත්ත්වය සැලකිල්ලට ගෙන එම මුදල ඉහළ නැංවිය යුතු බව ආණ්ඩුකාරතුමා පෙන්වා දුන්නේය. එමෙන්ම, එලුෙවිතීවූ, අනලෙයිතීවූ සහ නයිනතීවූ වැනි අනෙකුත් දූපත්වල සේවය කරන සේවකයින්ට ද මෙම අවදානම් දීමනාව ලබාදීමට නිසි පියවර ගත යුතු බව ඔහු සඳහන් කළේය.
සංවර්ධන නිලධාරීන්ගේ ස්ථාන මාරුවීම් සම්බන්ධයෙන් පවතින ගැටලු පිළිබඳව ද ආණ්ඩුකාරතුමා අවධානය යොමු කළේය. විශේෂයෙන් යාපනය දිස්ත්රික්කයේ පදිංචි මධ්යම රජයේ දෙපාර්තමේන්තුවල නිලධාරීන් දීර්ඝ කාලයක් පිට පළාත්වල සේවය කළද, ඔවුන්ට නැවත සිය උපන් දිස්ත්රික්කයට පැමිණීමට නොහැකි වී ඇති බැවින් ඔවුන්ට ස්ථාන මාරුවීම් ලබා දිය යුතු බව ඔහු පැවසීය.
උතුරු පළාතේ දීර්ඝ කාලයක සිට පවතින ශ්රී ලංකා පරිපාලන සේවය (SLAS), ශ්රී ලංකා ක්රම සම්පාදන සේවය (SLPS) සහ ශ්රී ලංකා ඉංජිනේරු සේවය (SLES) යන සේවාවන්හි නිලධාරී පුරප්පාඩු කඩිනමින් පිරවීමට පියවර ගන්නා ලෙස ඉල්ලා සිටියේය.
ආණ්ඩුකාරතුමා විසින් ඉදිරිපත් කරන ලද මෙම ඉල්ලීම් සම්බන්ධයෙන් අදහස් දැක්වූ උපදේශක අශෝක පීරිස් මහතා, මෙම කරුණු පිළිබඳව අමාත්යාංශ ලේකම්වරයා සහ අමාත්යවරයා සමඟ පුළුල් ලෙස සාකච්ඡා කර සාධාරණ විසඳුම් ලබා දීමට පියවර ගන්නා බවට සහතික විය.
මෙම සාකච්ඡාව සඳහා ආණ්ඩුකාර ලේකම් සිවපාදසුන්දරම් සත්යසීලන්, යාපනය දිස්ත්රික් සම්බන්ධීකරණ කමිටු සභාපතිවරයාගේ සම්බන්ධීකාරක එස්. කපිලන් සහ ආණ්ඩුකාරතුමාගේ පෞද්ගලික ලේකම් එස්. ශ්රීවාගීසන් යන මහත්වරු ද සහභාගී වූහ.
