ධීවර, ජලජ හා සාගර සම්පත් ගරු අමාත්‍ය රාමලිංගම් චන්ද්‍රසේකර් මහතාගේ සහ උතුරු පළාත් ගරු ආණ්ඩුකාර එන්. වේදනායගන් මහතාගේ සම සභාපතිත්වයෙන් යාපනය දිස්ත්‍රික් සම්බන්ධීකරණ කමිටු රැස්වීම අද (14.10.2026) යාපනය දිස්ත්‍රික් ලේකම් කාර්යාලයේදී පැවැත්විණි.
මෙහිදී අදහස් දැක්වූ ගරු ආණ්ඩුකාරතුමා, පසුගිය වසරට සාපේක්ෂව මෙම වසරේ සංවර්ධන කටයුතු සඳහා දෙගුණයක මුදලක් වෙන් කර ඇති බව සඳහන් කළේය. අමුද්‍රව්‍ය හිඟය ඇතුළු විවිධ අභියෝග මධ්‍යයේ වුවද, සියලුම දෙපාර්තමේන්තු ඒකාබද්ධව කටයුතු කරමින් ජනතාව වෙනුවෙන් ක්‍රියාත්මක කරන සංවර්ධන ව්‍යාපෘති නිසි පරිදි අවසන් කළ යුතු බවද එතුමා අවධාරණය කළේය. ගරු අමාත්‍යතුමා සිය අදහස් දැක්වීමේදී, ලබන වසරේදී ලැබීමට නියමිත අතිරේක ප්‍රතිපාදන කාර්යක්ෂමව ප්‍රයෝජනයට ගැනීම සඳහා දෙපාර්තමේන්තු සූදානමින් සිටිය යුතු බව ඉල්ලා සිටියේය.
මෙම රැස්වීමේදී නව සංවර්ධන ව්‍යාපෘති කිහිපයක් සඳහා වූ යෝජනා සලකා බලන ලදී. විශේෂයෙන්ම, ‘සමාජ ශක්ති’ දිළිඳුකම පිටුදැකීමේ වැඩසටහන යටතේ රුපියල් මිලියන 651.96ක වියදමින් ව්‍යාපෘති 334ක් ක්‍රියාත්මක කිරීම, ග්‍රාමීය මාර්ග සංවර්ධන වැඩසටහන යටතේ රුපියල් මිලියන 191.40ක වියදමින් මාර්ග 18ක් ප්‍රතිසංස්කරණය කිරීම සහ රුපියල් මිලියන 62.95ක වියදමින් මාර්ග ආරක්ෂාව වැඩිදියුණු කිරීමේ කටයුතු පිළිබඳව විස්තරාත්මකව සාකච්ඡා කරන ලදී. තවද, දිස්ත්‍රික් ලේකම් කාර්යාලය, මධ්‍යම රජය සහ පළාත් සභාව විසින් මෙම වසරේ ක්‍රියාත්මක කරනු ලබන කෘෂිකර්මාන්තය, නිවාස, පානීය ජලය සහ මාර්ග සංවර්ධනය ඇතුළු ව්‍යාපෘතිවල ප්‍රගතියද ඇගයීමට ලක් කෙරිණි.
ව්‍යාපෘති ක්‍රියාත්මක කිරීමේදී දෙපාර්තමේන්තු මුහුණ දෙන බාධා සම්බන්ධීකරණයෙන් යුතුව විසඳා ගැනීම පිළිබඳවද මෙහිදී සාකච්ඡා කෙරිණි. සුන්නාකම් සහ නාවක්කුළි ප්‍රදේශවල පිහිටි ජීව විද්‍යාත්මක පිරිපහදු මධ්‍යස්ථාන භාරදීම, නාවික හමුදාවේ සහාය ඇතිව ඩෙල්ෆ්ට් දූපතට ඉන්ධන සැපයීමේ කටයුතු සිදු කිරීම සහ යාපනය දිස්ත්‍රික්කයේ අපද්‍රව්‍ය කළමනාකරණය වැඩිදියුණු කිරීම සම්බන්ධයෙන්ද මෙහිදී කරුණු සාකච්ඡා කරන ලදී.
පාර්ලිමේන්තු මන්ත්‍රීවරුන්, පළාත් සභාවේ සභාපතිවරයා, රාජ්‍ය අංශයේ ජ්‍යෙෂ්ඨ නිලධාරීන් සහ ත්‍රිවිධ හමුදා නියෝජිතයන් ඇතුළු පිරිසක් මෙම රැස්වීමට සහභාගි වූහ.
