කිලිනොච්චියේ සිට නව යාන්ත්රණයක් හරහා මාසයක් ඇතුළත වැලි බෙදා හැරීම ආරම්භ කිරීම සහ වැලි මිල අඩකින් අඩු කිරීම ඇතුළු වැදගත් තීරණ කිහිපයක් කිලිනොච්චි දිස්ත්රික් වැලි සහ ග්රැවල් (බොරළු) බෙදා හැරීමේ රැස්වීමේදී ගනු ලැබීය.
උතුරු පළාත් ගරු ආණ්ඩුකාර එන්. වේදනායගම් මහතා සහ “පිරිසිදු ලංකා” කාර්ය සාධක බලකායේ පළාත් සම්බන්ධීකාරක මෙන්ම ධීවර, ජලජ හා සාගර සම්පත් අමාත්ය ගරු ඉ. චන්ද්රසේකර මහතාගේ නියෝජිත සු. කපිලන් මහතාගේ විශේෂ සහභාගීත්වයෙන්, කිලිනොච්චි දිස්ත්රික් ලේකම් සු. මුරලිදරන් මහතාගේ ප්රධානත්වයෙන් මෙම රැස්වීම අද (2026.04.10) සිකුරාදා පෙරවරුවේ කිලිනොච්චි දිස්ත්රික් ලේකම් කාර්යාලයේදී පැවැත්විණි.
සාකච්ඡාව ආරම්භයේදී අදහස් දැක්වූ ගරු ආණ්ඩුකාරවරයා සඳහන් කළේ, නීතිවිරෝධී වැලි කැණීම් ඉහළ ගොස් ඇති අතර යාපනය දිස්ත්රික්කයේ වැලි මිල ද ශීඝ්රයෙන් ඉහළ යමින් පවතින බවයි. එබැවින් වැලි බෙදා හැරීමේ දාමය විධිමත් කිරීමේ විශාල වගකීමක් පවතින බව ඔහු පැවසීය. “ගරු ජනාධිපති අනුර කුමාර දිසානායක මහතාගේ නායකත්වයෙන් යුත් රජය ජනතාව තෝරා පත් කර ගැනීමට ප්රධාන හේතුව දූෂණය තුරන් කිරීමයි. මෙම රජය පවතින කාලය තුළ වැලි බෙදා හැරීමේ ගැටලුවට විසඳුම් සෙවීමට අපට නොහැකි වුවහොත් වෙනත් කිසිදු අවස්ථාවක එය කළ නොහැකි වනු ඇතැයි” ඔහු වැඩිදුරටත් ප්රකාශ කළේය.
භූ විද්යා සමීක්ෂණ හා පතල් කාර්යාංශයේ සභාපති සමන් ජයසිංහ මහතා පසුගිය මාර්තු 10 වැනිදා ආණ්ඩුකාර කාර්යාලයට පැමිණි අවස්ථාවේ ගත් තීරණවලට අනුව මෙම දිස්ත්රික් මට්ටමේ රැස්වීම් දිස්ත්රික් ලේකම්වරුන්ගේ ප්රධානත්වයෙන් සංවිධානය කර ඇත. මෙම දිස්ත්රික් කමිටුවේ අනුමැතියකින් තොරව කිසිදු ක්රියාමාර්ගයක් නොගත යුතුය. වැලි ලබාගත හැකි ස්ථාන හඳුනා ගැනීම, ඒවා එකතු කිරීම සහ ජනතාවට බෙදා හැරීම යන යාන්ත්රණයන්හිදී පළාත් පාලන ආයතනවලට ප්රමුඛතාවය ලබා දීමට පළාත් මට්ටමේ රැස්වීමේදී තීරණය වූ බවත් ඒ අනුව ඉදිරි කටයුතු සිදු කෙරෙන බවත් ඔහු පෙන්වා දුන්නේය.
මෙහිදී වැලි බෙදා හැරීම සම්බන්ධයෙන් මෙතෙක් ගෙන ඇති ක්රියාමාර්ග පිළිබඳව දිස්ත්රික් ලේකම්වරයා විසින් සවිස්තරාත්මක පැහැදිලි කිරීමක් කරන ලද අතර, එහිදී පහත සඳහන් වැදගත් තීරණ ගන්නා ලදී:
කල්මඩුකුලම් වැව ප්රතිසංස්කරණය කිරීමෙන් ලබාගෙන කරච්චි ප්රාදේශීය සභාව හරහා බෙදා හැරීමෙන් පසු ඉතිරි වී ඇති වැලි කඩිනමින් බෙදා හැර අවසන් කිරීමට තීරණය විය.
අඛණ්ඩ වර්ෂාව සහ ගංවතුර හේතුවෙන් ගංගා ආශ්රිතව තැන්පත් වී ඇති වැලි වැටි ඉවත් කර සුදුසු ස්ථානවල ගබඩා කිරීම පිළිබඳව අවධානය යොමු කෙරිණි. දිවා කාලයේදී ප්රාදේශීය සභාවේ කොන්ත්රාත්කරුවන් වැලි කැණීම් කරන ස්ථානවලම රාත්රී කාලයේදී නීතිවිරෝධී කැණීම් සිදුවන බව කරච්චි ප්රාදේශීය සභාවේ සභාපතිවරයා පෙන්වා දුන්නේය. ඒ අනුව එම ප්රදේශවලට අවශ්ය ආරක්ෂාව සැපයීමට පොලිසිය එකඟතාව පළ කළේය.
ප්රාදේශීය සභා හරහා කැණීම් කොන්ත්රාත් ලබා ගත් පුද්ගලයින් ඒවා හිතාමතා ප්රමාද කිරීම වැළැක්වීම සඳහා අදාළ දෙපාර්තමේන්තු එක්ව ක්ෂේත්ර පරීක්ෂණ පවත්වා, වැලි ප්රමාණය ගණනය කර ඒවා කැණීම සඳහා කාලසීමාවක් නියම කිරීමට තීරණය විය. ඒ අනුව ඉරණමඩු අතිරික්ත ජලය පිටවන ගංගා ප්රදේශය, අක්කරායන් ආරු සහ කල්ලාරු ප්රදේශවල ක්ෂේත්ර පරීක්ෂණ පැවැත්වීමට තීරණය විය.
අක්කරායන් ආරු ප්රදේශයේ වැලි වැටිවලින් වැලි ලබා ගැනීමේ කටයුතු තමන්ට සිදු කළ නොහැකි බව පළාත් පාලන ආයතනය ප්රකාශ කිරීම නිසා, එය සුදුසු පොදු සංවිධානයක් හරහා සිදු කිරීම පිළිබඳව සාකච්ඡා කෙරිණි.
පලෙයි (පච්චිලෙයිපල්ලි) ප්රාදේශීය ලේකම් කොට්ඨාසයේ පුදුක්කාඩු ප්රදේශයේ ඇති වැලි වහාම බෙදා හැරීම සඳහා අවශ්ය අවසර පත්ර කඩිනමින් ලබා දෙන ලෙස භූ විද්යා සමීක්ෂණ හා පතල් කාර්යාංශයට උපදෙස් දෙන ලදී. මීට අමතරව කරියාලයි නාගපඩුවන් වැව, පන්ඩිට්වෙට්ටි වැව, කුඩමුරුට්ටි වැව, ඉරණමඩු වැව සහ කල්මඩු වැව යන ස්ථානවලින් යන්ත්ර සූත්ර මගින් වැලි සෝදා ගැනීමට (Sand washing) කොන්ත්රාත් ලබා දී ඇති අතර, ඊට අදාළ අනෙකුත් අවසරයන් සඳහා වන ක්ෂේත්ර පරීක්ෂණ කඩිනම් කිරීමට ද තීරණය විය.
වැලි වැටිවලින් ලබා ගන්නා වැලි සහ සෝදා ලබා ගන්නා වැලි සඳහා අවසාන මිල, කැණීම් සහ ප්රවාහන වියදම් ඇතුළු සියලු වියදම් සැලකිල්ලට ගෙන දිස්ත්රික් කමිටුව විසින් තීරණය කරනු ලැබේ. මූලික පියවරක් ලෙස පළාත් පාලන ආයතන හරහා ලොරි රථ හිමියන්ගේ සංගම් මගින් වැලි බෙදා හැරීමටත්, පර්යේෂණාත්මකව පළාත් පාලන ආයතන පරිශ්රයන්හි සිට කුඩා ඇසුරුම් මගින් වැලි අලෙවි කිරීමටත් තීරණය විය.
කිලිනොච්චි දිස්ත්රික්කයෙන් අවම වශයෙන් වැලි කියුබ් 20,000ක් ලබාගත හැකි බවට ඇස්තමේන්තු කර ඇත. මෙය නිසි යාන්ත්රණයක් හරහා අඛණ්ඩව බෙදා හැරීම මගින් වැලි මිල සැලකිය යුතු ලෙස අඩු කිරීමටත් නීතිවිරෝධී කැණීම් පාලනය කිරීමටත් හැකි වනු ඇතැයි ප්රකාශ විය.
මෙහිදී අදහස් දැක්වූ “පිරිසිදු ලංකා” කාර්ය සාධක බලකායේ පළාත් සම්බන්ධීකාරක සු. කපිලන් මහතා පැවසුවේ, නීතිවිරෝධී වැලි බෙදා හැරීමේ කටයුතු රජය විසින් දැඩි ලෙස පාලනය කරන බවයි. අනාගතයේදී වැලි බලපත්ර සහ බෙදා හැරීම විද්යුත්කරණය කර QR කේත ක්රමවේදයක් හරහා ක්රියාත්මක කිරීමට අපේක්ෂා කරන බවත් ඔහු පැවසීය.
අතීතයේදී පුද්ගලයින්ට ලබා දුන් බලපත්ර තවදුරටත් දීර්ඝ කිරීමේ අවශ්යතාවක් දැනට නොමැති බවත්, මේ සඳහා ප්රමුඛතාවය පළාත් පාලන ආයතනවලට ලබා දෙන බවත් ඔහු සඳහන් කළේය. ඔවුන් එම කටයුතු කිරීමට අපොහොසත් වුවහොත් හෝ අක්රමිකතාවල නිරත වුවහොත් පමණක් අනාගතයේදී පුද්ගලික අංශයට බලපත්ර ලබා දීම පිළිබඳව දිස්ත්රික් කමිටුව සලකා බලනු ඇත.
මෙම නව යාන්ත්රණය සඳහා පූර්ණ ආරක්ෂාව සහ සහයෝගය ලබා දීමට සූදානම් බව කිලිනොච්චි කලාප භාර ජ්යෙෂ්ඨ පොලිස් අධිකාරීවරයා මෙහිදී සහතික විය.
මෙම සාකච්ඡාව සඳහා ගරු ආණ්ඩුකාරවරයා, දිස්ත්රික් ලේකම්, පිරිසිදු ලංකා කාර්ය සාධක බලකායේ පළාත් සම්බන්ධීකාරක, ප්රාදේශීය ලේකම්වරුන්, පළාත් පාලන සහකාර කොමසාරිස්, ප්රාදේශීය සභා සභාපතිවරුන්, වාරිමාර්ග ඉංජිනේරුවන්, ප්රාදේශීය සභා ලේකම්වරුන්, භූ විද්යා සමීක්ෂණ හා පතල් කාර්යාංශයේ ප්රාදේශීය ඉංජිනේරු, වන සංරක්ෂණ දෙපාර්තමේන්තු නියෝජිතයින්, ජ්යෙෂ්ඨ පොලිස් අධිකාරී, කිලිනොච්චි මූලස්ථාන පොලිස් පරීක්ෂක සහ මධ්යම පරිසර අධිකාරියේ නියෝජිතයෝ සහභාගී වූහ.
