කිලිනොච්චි දිස්ත්‍රික් මහ රෝහලේ සම්පූර්ණයෙන්ම නොමිලේ ලබා දෙන ‘කෘත්‍රිම සිංචනය’ සේවාව සුමට හා කාර්යක්ෂමව පවත්වාගෙන යාම සඳහා සම්පත් සහ පරිපාලනමය විධිවිධාන සහතික කරන ලෙස උතුරු පළාත් ගරු ආණ්ඩුකාරතුමා එන්. වේදනායකන් මහතා අදාළ බලධාරීන්ට උපදෙස් දී තිබේ. මේ සම්බන්ධයෙන් විශේෂ සාකච්ඡාවක් අද (2026.10.08) ආණ්ඩුකාර ලේකම් කාර්යාලයේදී ගරු ආණ්ඩුකාරතුමාගේ ප්‍රධානත්වයෙන් පැවැත්විණි.
මෙම රැස්වීමේදී, වෛද්‍ය විශේෂඥ සී. රඝුරාමන මහතා යාපනය විශ්ව විද්‍යාලයේ වෛද්‍ය පීඨය සමඟ සහයෝගයෙන් සිදු කරනු ලබන මෙම සේවාවේ මෙතෙක් ලබා ඇති ප්‍රගතිය පැහැදිලි කළේය. ශ්‍රී ලංකාවේ රජයේ රෝහලක නොමිලේ ලබා දෙන මෙම සේවාවේ ගුණාත්මකභාවය සහ අඛණ්ඩතාව සහතික කිරීමේ අවශ්‍යතාවය ගරු ආණ්ඩුකාරතුමා අවධාරණය කළේ එය වෛද්‍ය සේවාවක් පමණක් නොව පවුල්වල අනාගත බලාපොරොත්තුවට සම්බන්ධ බැවිනි.
මෙම සාකච්ඡාවට ආණ්ඩුකාර ලේකම්, සෞඛ්‍ය අමාත්‍යාංශයේ ලේකම්, පළාත් සෞඛ්‍ය සේවා අධ්‍යක්ෂ, කිලිනොච්චි රෝහලේ අධිකාරී සහ ගණකාධිකාරීවරුන් ඇතුළු නිලධාරීන් කිහිප දෙනෙකු සහභාගී විය.
