සංවර්ධන නිලධාරීන්ගේ ගෞරවයට සහ වෘත්තීය සුභසාධනයට බලපෑම් එල්ල වී ඇති බවට ඉදිරිපත් කර ඇති චෝදනා සම්බන්ධයෙන් ස්වාධීන හා අපක්ෂපාතී පරීක්ෂණයක් පැවැත්වීම සඳහා ස්වාධීන පරීක්ෂණ කමිටුවක් පත් කරන බව උතුරු පළාත් ගරු ආණ්ඩුකාර නා. වේදනායගන් මහතා සහතික විය.
උතුරු පළාත් සභා කාර්යාල පරිශ්රය ඉදිරිපිට අද (2026.08.17) සඳුදා උදෑසන විරෝධතාවක නිරත වූ උතුරු පළාත් වෘත්තීය සමිති සම්මේලනයේ නියෝජිතයෝ, අනතුරුව උතුරු පළාත් ආණ්ඩුකාරවරයා හමු වී සිය සංදේශය භාර දුන්හ. ඔවුන්ගෙන් නියෝජිතයින් පස් දෙනෙකුට ආණ්ඩුකාරවරයා හමු වී සිය අදහස් ඉදිරිපත් කිරීමට අවස්ථාව හිමි විය.
ඔවුන් භාර දුන් සංදේශයේ සඳහන් කර ඇත්තේ, සංවර්ධන නිලධාරීන්ගේ ගෞරවයට සහ වෘත්තීය සුභසාධනයට හානි සිදුවූ බව කියන සිද්ධිය සම්බන්ධයෙන් ස්වාධීන හා අපක්ෂපාතී පරීක්ෂණයක් පැවැත්විය යුතු බවත්, සිද්ධියට අදාළ ශ්රව්ය හා දෘශ්ය පටිගත කිරීම් ඇතුළු සාක්ෂි නිසි ලෙස ආරක්ෂා කර පරීක්ෂාවට ලක් කළ යුතු බවත්ය. තවද, පරීක්ෂණයේ නිගමන මත පදනම්ව සුදුසු පරිපාලනමය හෝ විනය පියවර ගත යුතු බවද ඔවුහු අවධාරණය කළහ.
මෙහිදී, සංවර්ධන නිලධාරීන් ඉදිරිපත් කළ කරුණු සහ අපේක්ෂාවන් පිළිබඳව ආණ්ඩුකාරවරයා සවන් දුන් අතර, අදාළ කරුණ සම්බන්ධයෙන් සත්යතාව තහවුරු වන පරිදි ස්වාධීන පරීක්ෂණයක් පවත්වන බව පැවසීය.
එමෙන්ම, රාජ්ය සේවයේ නිරත වන ඕනෑම පාර්ශවයක ගෞරවය සහ අයිතිවාසිකම් ආරක්ෂා කිරීමේ අවශ්යතාව පෙන්වා දුන් ආණ්ඩුකාරවරයා, මෙවැනි සිදුවීම් නැවත සිදු නොවන පරිදි සුදුසු පියවර ගත යුතු බවද සඳහන් කළේය.
