යාපනය දිස්ත්රික් රාජ්ය නොවන සංවිධාන ජාලයේ විධායක නිලධාරීන් සහ උතුරු පළාත් ගරු ආණ්ඩුකාර නා. වේදනායගම් මහතා අතර විශේෂ සාකච්ඡාවක් අද (2026.04.07) අඟහරුවාදා දින ආණ්ඩුකාර කාර්යාලයේදී පැවැත්විණි.
මෙම සාකච්ඡාවේදී යාපනය දිස්ත්රික්කයේ ජනතාවගේ ජීවනෝපාය සංවර්ධනය, සමාජීය ගැටලුවලට විසඳුම් සෙවීම සහ සිවිල් සමාජ සංවිධානවල අනාගත ක්රියාකාරකම් ඇතුළු වැදගත් කරුණු රැසක් පිළිබඳව දීර්ඝව අවධානය යොමු කෙරිණි.
පළාතේ සංවර්ධනය අරමුණු කරගනිමින්, කොළඹ පිහිටි අරමුදල් සපයන ආයතන, තානාපති කාර්යාල සහ විවිධ සංවිධානවල නියෝජිතයින් ඒකාබද්ධ කර විශේෂ සම්මන්ත්රණයක් පැවැත්වීමට සැලසුම් කර ඇති බව එම සංවිධාන ජාලයේ නියෝජිතයෝ මෙහිදී ආණ්ඩුකාරවරයාට දැනුම් දුන්හ.
ගල්ෆ් කලාපයේ පවතින යුද වාතාවරණය හේතුවෙන් මෙම සම්මන්ත්රණය තරමක් ප්රමාද වුවද, තත්ත්වය යහපත් වූ පසු උතුරු පළාතේ දිස්ත්රික්ක පහ සඳහාම මූල්ය හා තාක්ෂණික සම්පත් ලබාගැනීමේ අරමුණින් මෙම සම්මන්ත්රණය පැවැත්වීමට ආණ්ඩුකාරවරයාගේ උපදෙස් සහ මගපෙන්වීම් එහිදී ඉල්ලා සිටින ලදී.
තවද, උතුරු පළාතේ දිස්ත්රික්ක පහේම පවතින රාජ්ය නොවන සංවිධාන ජාලයන් ඒකාබද්ධ කර ‘උතුරු පළාත් රාජ්ය නොවන සංවිධාන එකමුතුවක්’ පිහිටුවීම සඳහා වූ ඉල්ලීමද මෙහිදී ඉදිරිපත් විය. මේ සඳහා දිස්ත්රික් ලේකම්වරුන් හරහා එක් එක් දිස්ත්රික්කයෙන් නියෝජිතයින් පස් දෙනෙකු බැගින් කැඳවා ආණ්ඩුකාර කාර්යාලයේදී රැස්වීමක් පවත්වන ලෙසද ඔවුහු ඉල්ලා සිටියහ.
එමෙන්ම, රජයේ දෙපාර්තමේන්තු මගින් ක්රියාත්මක කරනු ලබන වැඩසටහන්වලදී සිවිල් සමාජයේ හඬ නිරූපණය වන පරිදි, සමාජ නියෝජිතයින් ලෙස එම ජාලයේ සාමාජිකයින්ටද සුදුසු අවස්ථාවන් ලබාදිය යුතු බව අවධාරණය කෙරිණි.
ආර්ථික වශයෙන් බෙහෙවින් පසුගාමී සහ ඉඩම් නොමැතිව ජීවත්වන කුලී කම්කරු පවුල් මුහුණ දෙන ගැටලු පිළිබඳවද මෙම හමුවේදී ගැඹුරින් සාකච්ඡා විය. මෙවැනි පවුල්වල පුද්ගලයින් මත්ද්රව්ය භාවිතය සහ කඩු කල්ලි වැනි සමාජ විරෝධී ක්රියාවන්ට ගොදුරු වීමේ වැඩි අවදානමක් පවතින බැවින්, ඔවුන් නැවත සමාජගත කිරීමේ අවශ්යතාවය පෙන්වා දෙන ලදී.
වසර දහයකට වැඩි කාලයක් කිසිවෙකු අයිතිවාසිකම් නොකියන ලද ඉඩම්වල පදිංචිව සිටින මෙවැනි පවුල් සඳහා, දෙපාර්තමේන්තු ප්රධානීන් සම්බන්ධීකරණය කර එම ඉඩම්වල අයිතිය ලබාදීමට පියවර ගන්නා ලෙසද ඉල්ලීමක් කෙරිණි.
මීට අමතරව, පළාතේ තරුණ තරුණියන් සඳහා රැකියා අවස්ථා නිර්මාණය කිරීම සහ ඔවුන් සවිබල ගැන්වීම සම්බන්ධයෙන්ද මෙහිදී දීර්ඝව සාකච්ඡා කෙරිණි.
සංවිධාන ජාලයේ නියෝජිතයින් ඉදිරිපත් කළ ඉල්ලීම් පිළිබඳව විශේෂ අවධානය යොමු කළ ගරු ආණ්ඩුකාරවරයා, මහජන සුභසිද්ධිය වෙනුවෙන් පළාත් පාලන පරිපාලනය විසින් දැනටමත් ආරම්භ කර ඇති පියවර පිළිබඳව පැහැදිලි කළේය. තවද, පළාතේ සමාජ හා ආර්ථික සංවර්ධනය උදෙසා ඉදිරියේදී සිවිල් සමාජ සංවිධාන සමඟ එක්ව කටයුතු කිරීමට පූර්ණ අවස්ථාව ලබාදෙන බවද ඔහු සඳහන් කළේය.
