උතුරු පළාතේ ගම්මානවල නම් භාවිතා කරමින් වෙනත් රටවල නිෂ්පාදනය කරන ව්යාජ නිෂ්පාදන යුරෝපීය රටවල අලෙවි කිරීම පාලනය කිරීමට අවශ්ය පියවර ගන්නා ලෙස, උතුරු පළාත් ගරු ආණ්ඩුකාර නා. වේදනායගම් මහතා ශ්රී ලංකාවේ ප්රංශ සහ ජර්මානු තානාපතිවරුන්ගෙන් විශේෂ ඉල්ලීමක් කළේය.
අනාගතයේදී උතුරු පළාතට ආවේණික දේශීය නිෂ්පාදන යුරෝපීය වෙළෙඳපොළට අපනයනය කිරීමේදී, දැනටමත් එහි වෙළෙඳපොළ ආක්රමණය කර ඇති මෙවැනි ව්යාජ නිෂ්පාදන තම පළාතේ ආර්ථිකයට විශාල අභියෝගයක් වනු ඇති බව ආණ්ඩුකාරවරයා මෙහිදී පෙන්වා දුන්නේය.
උතුරු පළාතේ නිල සංචාරයක නිරත වූ ශ්රී ලංකාවේ ප්රංශ තානාපති රෙමී ලැම්බර්ට් (Remi Lambert) සහ ජර්මානු තානාපති ෆීලික්ස් නිව්මන් (Felix Neumann) යන මහත්වරුන් උතුරු පළාත් ආණ්ඩුකාරවරයා හමුවී සාකච්ඡා කළ අවස්ථාවේදී මෙම ඉල්ලීම ඉදිරිපත් කෙරිණි. මෙම හමුව ඊයේ (23.02.2026) සඳුදා රාත්රියේ යාපනය ජෙට්වින් (Jetwing) හෝටලයේදී පැවැත්වුණු අතර, ඒ සඳහා ආණ්ඩුකාර ලේකම් එස්. සත්යසීලන් මහතා ද සහභාගී විය.
මෙම හමුවේදී ශ්රී ලංකාව සහ ප්රංශය, ජර්මනිය යන රටවල් අතර පවතින දිගුකාලීන සංස්කෘතික හා වෙළෙඳ සබඳතා පිළිබඳව තානාපතිවරුන් දෙපළ ආණ්ඩුකාරවරයා සමඟ දීර්ඝ වශයෙන් අදහස් හුවමාරු කරගත්හ.
විශේෂයෙන්ම උතුරු පළාතේ සංචාරක කර්මාන්තයේ දියුණුව පිළිබඳව මෙහිදී විශේෂ අවධානයක් යොමු විය. දකුණු ලංකාවට පැමිණෙන සංචාරකයන් උතුරට ආකර්ෂණය කර ගන්නේ කෙසේද යන්න පිළිබඳව තානාපතිවරුන් නැගූ ප්රශ්නවලට ආණ්ඩුකාරවරයා සවිස්තරාත්මක පැහැදිලි කිරීමක් කළේය. දකුණේ සිට උතුරට ගමන් කිරීමට ගතවන කාලය අධික බව පෙන්වා දුන් තානාපතිවරුන්, එම ගමන් කාලය අවම කිරීම හරහා වැඩි සංචාරකයන් පිරිසක් උතුරට ගෙන්වා ගත හැකි බව සඳහන් කළ අතර, ඒ සඳහා අධිවේගී මාර්ග ව්යාපෘති කිසිවක් ක්රියාත්මක වන්නේදැයි විමසා සිටියහ.
ඊට පිළිතුරු දුන් ආණ්ඩුකාරවරයා ප්රවාහන යටිතල පහසුකම් සංවර්ධනය, දේශීය ගුවන් සේවා සහ පළාතේ අනාගත සංචාරක ප්රවර්ධන සැලසුම් පිළිබඳව ඔවුන්ව දැනුවත් කළේය.
තවද, උතුරු පළාත් පරිපාලන ව්යුහය මධ්යම රජය සමඟ එක්ව කටයුතු කරන්නේ කෙසේද යන්න පිළිබඳව සහ පළාත් සභා මැතිවරණය පිළිබඳව ද තානාපතිවරු විමසා සිටියහ.
විදේශගත දෙමළ ජාතිකයන් උතුරේ ආයෝජනය කිරීමට වැඩි උනන්දුවක් දක්වන පසුබිමක, ඒ සඳහා වන ක්රියා පටිපාටි ලිහිල් කර ඇත්දැයි තානාපතිවරුන් නැගූ ප්රශ්නයට පිළිතුරු දුන් ආණ්ඩුකාරවරයා, “වත්මන් රජය ආයෝජන බෙහෙවින් දිරිමත් කරනවා. ඒ සඳහා වන සියලු මාර්ග විවෘතව පවතිනවා. එබැවින් විදේශගත ආයෝජකයන්ට කිසිදු පැකිලීමකින් තොරව තම ආයෝජන කටයුතුවල නිරත විය හැකියි” යනුවෙන් සහතික විය. මීට අමතරව, උතුරේ ආර්ථික වර්ධනයට වැදගත් කාර්යභාරයක් ඉටු කරන පලාලි හි පිහිටි යාපනය ජාත්යන්තර ගුවන් තොටුපළ සහ කාංකසන්තුරේ වරායෙහි වත්මන් සංවර්ධන ව්යාපෘති පිළිබඳව ද ආණ්ඩුකාරවරයා තානාපතිවරුන්ට පැහැදිලි කළේය.
උතුරු පළාතේ කාන්තා හා ළමා සංවර්ධනය පිළිබඳව ද මෙම සාකච්ඡාවේදී අවධානය යොමු විය. මෙම වසර සඳහා වන තම ජාතික සැලසුම්වලදී උතුරු පළාතට ප්රමුඛත්වය ලබා දී ඇති බවත්, විශේෂයෙන්ම ප්රංශ රජය උතුරේ ළමුන් සහ කාන්තාවන්ගේ ප්රගතිය පිළිබඳව දැඩි උනන්දුවක් දක්වන බවත් තානාපතිවරු සඳහන් කළහ. එමෙන්ම, ප්රංශ සහ ජර්මානු රජයන්හි අනුග්රහය ඇතිව උතුරේ ක්රියාත්මක වන ව්යාපෘතිවල වත්මන් තත්ත්වය පිළිබඳව ද ඔවුන් විමසා සිටි අතර, එම ව්යාපෘතිවල ප්රගතිය පිළිබඳව ආණ්ඩුකාරවරයා ඔවුන්ට විස්තර කළේය.
