රජයේ සේවය යනු වරප්රසාදයක් බවත්, කැපවීමෙන් යුතුව කටයුතු කර ආදර්ශවත් ලෙස ක්රියා කරන ලෙසත් නව පත්වීම් ලැබූ ක්රීඩා නිලධාරීන්ගෙන් උතුරු පළාත් ගරු ආණ්ඩුකාර නාගලිංගම් වේදනායගම් මහතා ඉල්ලා සිටියේය. උතුරු පළාතේ ක්රීඩා ක්ෂේත්රය තවදුරටත් නංවාලීම සඳහා ඔබේ සේවය ඉවහල් විය යුතු බව අවධාරණය කළ ආණ්ඩුකාරවරයා, ජනතාව සහ ඉහළ නිලධාරීන් තම ප්රදේශවලට “මෙම නිලධාරීන්ම අවශ්යයි” යනුවෙන් ඉල්ලා සිටින මට්ටමට ඔබේ සේවය ගොඩනගා ගත යුතු බව ද ප්රකාශ කළේය.
උතුරු පළාත් සභාවේ ක්රීඩා නිලධාරී (III ශ්රේණිය) සේවය සඳහා අලුතින් තේරී පත් වූ 11 දෙනෙකුට පත්වීම් ලිපි පිරිනැමීමේ උත්සවය අද (24.02.2026) අඟහරුවාදා පස්වරුවේ උතුරු පළාත් ආණ්ඩුකාර ලේකම් කාර්යාලයේදී පැවැත්විණි. මෙම අවස්ථාවට සහභාගී වී පත්වීම් ලිපි ප්රදානය කරමින් අදහස් දැක්වූ ආණ්ඩුකාරවරයා ඉහත කරුණු සඳහන් කළේය.
එහිදී අඛණ්ඩව අදහස් දැක්වූ ආණ්ඩුකාරවරයා වැඩිදුරටත් මෙසේ පැවසීය:
“කාර්ය මණ්ඩල හිඟය පියවීම සම්බන්ධයෙන් අප මධ්යම රජයෙන් අඛණ්ඩව ඉල්ලීම් කරමින් සිටිනවා. අපගේ ඉල්ලීම්වලට අනුව සියලුම පුරප්පාඩු පිරවීමට පූර්ණ අනුමැතිය නොලැබුණත්, ක්රීඩා දෙපාර්තමේන්තුවේ පැවති නිලධාරී පුරප්පාඩු 11ක් පිරවීමට අනුමැතිය ලැබීම විශාල වරප්රසාදයක්. වර්තමාන තත්ත්වය යටතේ රජයේ පත්වීමක් ලබා ගැනීම ඉතා දුෂ්කර කාර්යයක්. ඔබට ලැබී ඇති මෙම දුර්ලභ අවස්ථාවෙන් ඔබ නිසි ප්රයෝජන ගත යුතුයි.
රජයේ රාජකාරි භාරගත් පසු, ඔබේ වගකීම් ඉතා කැපවීමෙන් හා දක්ෂ ලෙස ඉටු කළ යුතුයි. බොහෝ දෙනෙක් පත්වීම් ලැබෙන තෙක් රටේ ඕනෑම ප්රදේශයක සේවය කිරීමට සූදානම් බව පැවසුවද, පත්වීම ලැබුණු පසු තම නිවෙස් අසලම සේවය කිරීමට කැමැත්තක් දක්වන බව පෙනෙන්නට තිබෙනවා. ඇතැම් අය ස්ථාන මාරුවීම් නොලැබුණු අවස්ථාවලදී සේවයෙන් ඉවත් වූ අවස්ථා ද තිබෙනවා. එබැවින් එවැනි තත්ත්වයන් මඟහරවා ගනිමින් ඔබ අන් අයට හොඳ ආදර්ශයක් විය යුතුයි.
දැනට උතුරු පළාතේ ක්රීඩා ක්ෂේත්රය විශාල ප්රගතිශීලී මාවතක ගමන් කරමින් තිබෙනවා. අලුතින් පත්වීම් ලැබූ ඔබ එකොළොස් දෙනාම එක්ව ක්රීඩා ක්ෂේත්රය තවදුරටත් ශක්තිමත් කර ඉදිරියට ගෙන යා යුතුයි” යැයි ද ආණ්ඩුකාරවරයා ඉල්ලා සිටියේය.
උතුරු පළාත් රාජ්ය සේවා කොමිෂන් සභාව විසින් ක්රීඩා නිලධාරී (III ශ්රේණිය) සේවය සඳහා අයදුම්පත් කැඳවීමට අනුව සුදුසුකම් ලත් 125 දෙනෙකු තරඟ විභාගයට පෙනී සිටියහ. විභාග ප්රතිඵල මත 20 දෙනෙකු සම්මුඛ පරීක්ෂණ සඳහා කැඳවා තිබූ අතර, ඔවුන්ගෙන් සුදුසුකම් ලැබූ 11 දෙනෙකුට අද දින පත්වීම් ප්රදානය කරන ලදී.
මෙම අවස්ථාවට උතුරු පළාත් ප්රධාන ලේකම්, ආණ්ඩුකාර ලේකම්, අධ්යාපන අමාත්යාංශයේ ලේකම්, උතුරු පළාත් රාජ්ය සේවා කොමිෂන් සභාවේ ලේකම්, ක්රීඩා දෙපාර්තමේන්තු අධ්යක්ෂ සහ අධ්යාපන අමාත්යාංශයේ සහකාර ලේකම්වරුන් ඇතුළු පිරිසක් සහභාගී වූහ.
