ප්‍රාථමික සෞඛ්‍ය සේවා පද්ධතිය වැඩිදියුණු කිරීමේ ව්‍යාපෘතිය යටතේ (Primary Healthcare System Enhancing Project) ලබන වසරේ අනලදිවු වෙත ගිලන් රථ බෝට්ටුවක් සහ 2027 දී නයිනදිවු වෙත වෛද්‍ය බෝට්ටුවක් ලබා දීමට පියවර ගනිමින් සිටින බව උතුරු පළාත් ගරු ආණ්ඩුකාර එන්. වේදනායකන් මහතාට දන්වා ඇත.
ලෝක බැංකු නියෝජිතයින්, මධ්‍යම සෞඛ්‍ය අමාත්‍යාංශය යටතේ ක්‍රියාත්මක වන ප්‍රාථමික සෞඛ්‍ය සේවා සංවර්ධන ව්‍යාපෘතියේ නියෝජිතයින් සහ යාපනය දිස්ත්‍රික් සෞඛ්‍ය සේවා අධ්‍යක්ෂවරයා 2025.10.09 දහවල් ආණ්ඩුකාර ලේකම් කාර්යාලයේදී ආණ්ඩුකාරවරයා හමුවී සාකච්ඡා පැවැත්වූහ.
ලෝක බැංකුවේ මූල්‍ය ආධාර ඇතිව ප්‍රාථමික සෞඛ්‍ය සේවා සංවර්ධන ව්‍යාපෘතිය 2024 සිට 2028 දක්වා ශ්‍රී ලංකාවේ පළාත් 9 තුළම ක්‍රියාත්මක කෙරේ. ඒ අනුව, 2026 දී උතුරු පළාතට රුපියල් මිලියන 500 ක් සහ 2027 සහ 2028 වසර සඳහා රුපියල් මිලියන 750 බැගින් වෙන් කර ඇත.
මෙම ප්‍රතිපාදන යටතේ උතුරු පළාතේ ප්‍රාථමික සෞඛ්‍ය මධ්‍යස්ථාන වැඩිදියුණු කෙරේ. ප්‍රාථමික සෞඛ්‍ය මධ්‍යස්ථාන ස්ථාපිත කිරීමේදී නිරීක්ෂණය වූ අවශ්‍යතා සහ වර්තමාන අවශ්‍යතා අතර වෙනස්කම් සැලකිල්ලට ගනිමින් වර්තමානයට ගැලපෙන පරිදි වැඩිදියුණු කිරීමට සැලසුම් කර ඇත.
මෙම ව්‍යාපෘතිය ක්‍රියාත්මක කිරීම සඳහා ලෝක බැංකු නියෝජිතයින් සහ ව්‍යාපෘති නියෝජිතයින් උතුරු පළාත් සභාවේ සහයෝගය ඉල්ලා සිටියහ. මෙම ව්‍යාපෘතියට අදාළව උතුරු පළාතේ පළමු සංචාරය සිදු කළ බව ද ඔවුහු ආණ්ඩුකාරවරයාට දන්වා සිටියහ.
මෙම ව්‍යාපෘතිය ක්‍රියාත්මක කිරීම සඳහා අවශ්‍ය සහයෝගය ලබා දෙන බවට ආණ්ඩුකාරවරයා සහතික විය.
