පාසල් සිසුන්ගේ ආරක්ෂිත ප්රවාහනය සහතික කිරීමේ අරමුණින්, ශ්රී ලංකාවේ ප්රථම වරට ඩිජිටල් තාක්ෂණයෙන් යුත් ‘සිසු සැරිය’ පාසල් බස් සේවාව අද (2026.07.01) බදාදා උදෑසන යාපනයේ කොඩිකාමම් මධ්යම බස් නැවතුම්පොළේදී නිල වශයෙන් දියත් කරන ලදී.
උතුරු පළාත් මාර්ගස්ථ මගී ප්රවාහන අධිකාරිය විසින් සංවිධානය කරන ලද මෙම සමාරම්භක අවස්ථාවට ධීවර, ජලජ විද්යා සහ සමුද්ර සම්පත් අමාත්ය සහ යාපනය දිස්ත්රික් සම්බන්ධීකරණ කමිටුවේ සභාපති ගරු ඊ. චන්ද්රසේකර් සහ පාර්ලිමේන්තු මන්ත්රී සහ චාවකච්චේරි ප්රාදේශීය සම්බන්ධීකරණ කමිටුවේ සභාපති ගරු කේ. ඉලංගුමාරන් යන මහත්වරු සහභාගී වූහ. ඊට අමතරව, චාවකච්චේරි ප්රාදේශීය ලේකම්, මාර්ගස්ථ මගී ප්රවාහන අධිකාරියේ සභාපති, සාමාන්යාධිකාරී, උතුරු ශ්රී ලංකා පෞද්ගලික බස් හිමියන්ගේ සංගමයේ සභාපති සහ යාපනය දිස්ත්රික් කලාපීය බස් සමාගම් ජාලයේ සභාපති ඇතුළු බොහෝ දෙනෙක් මෙම අවස්ථාවට සහභාගී වූහ.
පාසල් සිසුන් සහ ගුරුවරුන් ප්රවාහනය සඳහා වූ සුවිශේෂී සේවාවක් වන ‘සිසු සැරිය’ බස් සේවාව රට පුරා ක්රියාත්මක වේ. මෙම යෝජනා ක්රමය යටතේ සිසුන්ගෙන් ගාස්තුවෙන් අඩක් පමණක් අය කරනු ලබන අතර ඉතිරි මුදල රජය විසින් සහනාධාර ලබා දෙනු ලැබේ.
පෞද්ගලික බස් හිමියන්ගේ සංගමයේ පූර්ණ සහයෝගය ඇතිව, උසාන් සිට මෙම සේවාවට පෞද්ගලික බස් රථ දෙකක් සම්බන්ධ කර ඇත. උසාන් සිට යාපනය දක්වා බස් සේවාව සහ උසාන් සිට ෙප්දුරු තුඩුව දක්වා බස් සේවාව ආරම්භ කරන ලදී.
මෙම නව සේවාවේ විශේෂත්වය වන්නේ සිසුන්ගේ සහ ඔවුන්ගේ දෙමාපියන්ගේ ජංගම දුරකථන අංක පරිගණකයේ ලියාපදිංචි කර ඇති අතර සිසුන්ට විශේෂ ‘ඩිජිටල් කාඩ්පතක්’ නිකුත් කිරීමයි. සිසුවා බසයට ගොඩවී ස්පර්ශ තිරයේ ඩිජිටල් කාඩ්පත පෙන්වූ වහාම, ඔහු බසයට නැගුණු වේලාව ඇතුළු විස්තර කෙටි පණිවිඩයක් ලෙස දෙමාපියන්ගේ දුරකථනයට එනු ඇත.
එලෙසම, සිසුවා බසයෙන් බැස ස්පර්ශ තිරයේ කාඩ්පත පෙන්වූ විට, ඔහු ආරක්ෂිතව බැස ගිය වේලාව පිළිබඳ තොරතුරු දෙමාපියන්ගේ දුරකථනයට යවනු ලැබේ. මේ හරහා පාසල් යන සිසුන්ගේ ආරක්ෂාව සම්පූර්ණයෙන්ම සහතික කෙරේ. මෙම ඉතා ආදර්ශමත් ඩිජිටල් ව්යාපෘතිය පෞද්ගලික බස් රථයේ හිමිකරු විසින් තමන්ගේම වියදමින් ක්රියාත්මක කර තිබීම විශේෂත්වයකි.
උතුරු පළාතේ වවුනියාව දිස්ත්රික්කයේ මෙම මාසයේ ‘සිසු සැරිය’ සේවා දෙකක් ආරම්භ කර ඇති අතර, අද යාපනයේ ද සේවා දෙකක් ආරම්භ කර ඇත. මෙම බස් සේවා ඉදිරියේදී පළාතේ අනෙකුත් ප්රදේශවලට ව්යාප්ත කිරීමට නියමිත බව සැලකිය යුතු කරුණකි.
