කිලිනොච්චි දිස්ත්රික්කයේ පූනකරී, කෞතාරිමුනේ ප්රදේශයේ සංචාරක ක්ෂේත්රයේ ආයෝජන සිදු කිරීමට ඉදිරිපත් වී සිටින ආයෝජකයින් සඳහා ඉඩම් වෙන් කිරීම සම්බන්ධයෙන් ඉදිරි කටයුතු සිදු කිරීමේ අරමුණින්, රාජ්ය ආයතන, අදාළ ක්ෂේත්රවල විශේෂඥයින් සහ ආයෝජකයින් ඇතුළත් බහුකාර්ය කමිටුවක් පත් කිරීමට තීරණය කර ඇත.
මෙම තීරණය ගනු ලැබුවේ ධීවර, ජලජ හා සාගර සම්පත් අමාත්යතුමා මෙන්ම කිලිනොච්චි දිස්ත්රික් සම්බන්ධීකරණ කමිටුවේ ගරු සභාපති ඊ. චන්ද්රසේකර් මහතා සහ උතුරු පළාත් ගරු ආණ්ඩුකාරතුමා මෙන්ම කිලිනොච්චි දිස්ත්රික් සම්බන්ධීකරණ කමිටුවේ සම සභාපති එන්. වේදනායගන් මහතා යන මහත්වරුන්ගේ ප්රධානත්වයෙන්, කෞතාරිමුනේ ප්රදේශයේ සංචාරක ආයෝජකයින් වෙනුවෙන් අද (27.09.2026) ඉරිදා පැවති සාකච්ඡාවේදීය.
කෞතාරිමුනේ ප්රදේශයේ ආයෝජන සිදු කිරීම සඳහා පුද්ගලයින් 56 දෙනෙකු තම ආයෝජන ව්යාපෘති යෝජනා ඉදිරිපත් කර ඇති අතර, ඉන් 46 දෙනෙකු සම්මුඛ පරීක්ෂණයට සහභාගී වී ඇත. එම පිරිසෙන් 34 දෙනෙකු තම ව්යාපෘති සඳහා මූල්ය ප්රකාශන ද ඉදිරිපත් කර ඇත.
මීට පෙර කෞතාරිමුනේ ප්රදේශයේ සංචාරක ආයෝජන සිදු කිරීම සඳහා වූ ඉල්ලීම් කිලිනොච්චි දිස්ත්රික් සම්බන්ධීකරණ කමිටු රැස්වීමට ඉදිරිපත් වූ අවස්ථාවේදී, එම ප්රදේශයේ අනාගත සංවර්ධනය සැලකිල්ලට ගනිමින් ඒකාබද්ධ සංවර්ධන සැලැස්මක් සකස් කරන ලෙස නාගරික සංවර්ධන අධිකාරියෙන් ඉල්ලා තිබුණි. ඒ අනුව සකස් කරන ලද සංවර්ධන සැලැස්ම අද පැවති සාකච්ඡාවේදී ඉදිරිපත් කර සාකච්ඡාවට ලක් කරන ලදී.
ඉන් අනතුරුව පැවති සාකච්ඡාවේදී කෞතාරිමුනේ ප්රදේශයේ යටිතල පහසුකම් සංවර්ධනය, ආයෝජන සඳහා ඉඩම් වෙන් කිරීම, පවතින ක්රියාපටිපාටිමය ගැටලු සහ ආයෝජකයින් මුහුණ දෙන ප්රමාදයන් ඇතුළු කරුණු රැසක් පිළිබඳව විස්තරාත්මකව සාකච්ඡා කරන ලදී.
මෙම ප්රදේශයට අවශ්ය යටිතල පහසුකම් රජය විසින් සපයා දීමට අවශ්ය පියවර ගන්නා බව ගරු අමාත්ය ඊ. චන්ද්රසේකර් මහතා ප්රකාශ කළේය.
මෙහිදී ආයෝජකයින් තමන් මුහුණ දෙන විවිධ ගැටලු, විශේෂයෙන් පරිපාලන හා ක්රියාපටිපාටිමය ප්රමාදයන් සම්බන්ධයෙන් කරුණු ඉදිරිපත් කළහ.
ඊට ප්රතිචාර දක්වමින් කිලිනොච්චි දිස්ත්රික් ලේකම් එස්. මුරලිදරන් මහතා ප්රකාශ කළේ, ආයෝජන සඳහා යෝජිත ඉඩම් මැනුම් කටයුතු සිදු කර සූදානම් තත්ත්වයේ පවතින බවත්, කුමන ආයෝජකයාට කුමන ප්රදේශයෙන් කොපමණ ඉඩම් ප්රමාණයක් ලබාදිය යුතුද යන්න සම්බන්ධයෙන් තාක්ෂණික පදනම මත තීරණයක් ගැනීමට පමණක් ඉතිරිව ඇති බවත්ය.
ඒ අනුව, අදාළ රාජ්ය ආයතන, ක්ෂේත්ර විශේෂඥයින් සහ ආයෝජකයින් ඇතුළත් කමිටුවක් පත් කර, එම කමිටුවේ නිර්දේශ මත ආයෝජකයින් වෙත ඉඩම් ලබාදීමේ ක්රියාවලිය එළඹෙන නොවැම්බර් මාසය අවසන් වන විට ආරම්භ කිරීමට ද තීරණය කරන ලදී.
මෙම කමිටුව සඳහා උතුරු පළාත් සංචාරක කාර්යාංශය සහ වවුනියා විශ්වවිද්යාලය ද ඇතුළත් කිරීමට තීරණය කර ඇත.
කෞතාරිමුනේ ප්රදේශයේ සංචාරක ක්ෂේත්රය මූලික කරගත් ආයෝජන සැලසුම් සහගතව ක්රියාත්මක කිරීම සඳහා අවශ්ය යටිතල පහසුකම් සංවර්ධනය සහ ඉඩම් වෙන් කිරීමේ කටයුතු ඒකාබද්ධව සිදු කිරීම සඳහා මෙම තීරණය වැදගත් ඉදිරි පියවරක් ලෙස සැලකේ.
මෙම සාකච්ඡාව සඳහා ගරු අමාත්ය ඊ. චන්ද්රසේකර් මහතා, ගරු ආණ්ඩුකාර එන්. වේදනායගන් මහතා, කිලිනොච්චි දිස්ත්රික් ලේකම් එස්. මුරලිදරන් මහතා, පූනකරී ප්රාදේශීය ලේකම්, පූනකරී ප්රාදේශීය සභාවේ ගරු සභාපති, උතුරු පළාත් සංචාරක කාර්යාංශයේ සභාපති, උතුරු පළාත් ඉඩම් කොමසාරිස්, පිරිසිදු ශ්රී ලංකා කාර්ය සාධක බලකායේ කිලිනොච්චි දිස්ත්රික් සම්බන්ධීකාරක, පූනකරී ප්රාදේශීය සභාවේ ලේකම්, නාගරික සංවර්ධන අධිකාරියේ නිලධාරීන්, ආයෝජකයින් ඇතුළු පිරිසක් සහභාගී වූහ.
