උතුරු පළාතේ ආරම්භ කර ඇති පොල් ත්රිකෝණ කලාපීය ව්යාපෘතියේ ප්රගතිය සහ වෙරළබඩ ප්රදේශවල පොල් පැළ සිටුවීම පිළිබඳව සොයා බැලීමේ සාකච්ඡාවක් උතුරු පළාත් ගරු ආණ්ඩුකාර නා. වේදනායගම් මහතාගේ ප්රධානත්වයෙන් අද (2026.03.27) සිකුරාදා පස්වරුවේ ආණ්ඩුකාර ලේකම් කාර්යාලයේදී පැවැත්විණි.
මෙම සාකච්ඡාවට සහභාගී වූ පොල් වගා කිරීමේ මණ්ඩලයේ සහකාර සාමාන්යාධිකාරී ටී. වෛකුන්දන් මහතා, ගරු ජනාධිපති අනුර කුමාර දිසානායක මැතිතුමා විසින් පසුගිය වසරේ සැප්තැම්බර් මාසයේදී ආරම්භ කරන ලද පොල් ත්රිකෝණ කලාපීය ව්යාපෘතියේ ප්රගතිය පිළිබඳව පැහැදිලි කළේය.
අක්කර 16,000ක් හඳුනාගෙන ප්රතිලාභීන් සඳහා අවශ්ය පොල් පැළ බෙදා දී ඇති බවත්, මෙම වසරේ ද එහි අඛණ්ඩ ව්යාපෘතියක් ක්රියාත්මක වන බවත් ඔහු සඳහන් කළේය. එමෙන්ම මෙම ව්යාපෘතිය ඉදිරියට ගෙනයාමේදී මුහුණ දීමට සිදුවන අභියෝග පිළිබඳව ද ඔහු පැහැදිලි කළේය.
මේ අතර, ගරු ආණ්ඩුකාරතුමාගේ ඉල්ලීම පරිදි උතුරු පළාතේ උචිත වෙරළබඩ ප්රදේශවල පොල් පැළ සිටුවීමේ හැකියාව පිළිබඳව ද ඔහු කරුණු ඉදිරිපත් කළේය. ඇතැම් ධීවර සමිති ද මෙම වැඩපිළිවෙළට සහය පළ කර ඇති බව ඔහු පෙන්වා දුන්නේය. ඒ අනුව, යාපනය දිස්ත්රික්කයෙන් එක් ගම්මානයක් තෝරාගෙන එහි වෙරළ තීරයේ පොල් පැළ සිටුවා මෙම ව්යාපෘතිය ආරම්භ කිරීමට මෙහිදී තීරණය විය.
තවද, උතුරු පළාතේ ව්යාප්ත වී ඇති සුදු මැස්සාගේ (Whitefly) බලපෑම පාලනය කිරීම සම්බන්ධයෙන් පසුගිය වසරේ පියවර ගත් බව පෙන්වා දුන් ගරු ආණ්ඩුකාරතුමා, පවතින උණුසුම් කාලගුණයත් සමඟ නැවතත් සුදු මැස්සාගේ බලපෑම වැඩි වී ඇති බව සඳහන් කළේය.
ජෛව විද්යාත්මක පාලන ක්රමය (Biological control) හොඳම විසඳුම වන බැවින්, උතුරු පළාත් සභාව මගින් ලබාදුන් ප්රතිපාදන මත කිලිනොච්චියේ පිහිටි කෘෂිකාර්මික පර්යේෂණ අංශය මගින් සිදුකරන පර්යේෂණ කටයුතු කඩිනම් කරන ලෙස ආණ්ඩුකාරතුමා ඉල්ලා සිටියේය. පොල් වගා කිරීමේ මණ්ඩලයේ පර්යේෂණ අංශයට සහ අදාළ විෂය භාර අමාත්යවරයාට මේ සම්බන්ධයෙන් දැනටමත් ලිපි යොමු කර ඇති බවත්, පර්යේෂණ කණ්ඩායම කඩිනමින් මෙහි කැඳවීමට අපේක්ෂා කරන බවත් ආණ්ඩුකාරතුමා මෙහිදී වැඩිදුරටත් පැවසීය.
මෙම සාකච්ඡාව සඳහා උතුරු පළාත් ප්රධාන ලේකම්, ආණ්ඩුකාර ලේකම්, උතුරු පළාත් කෘෂිකර්ම අමාත්යාංශයේ ලේකම්, යාපනය අතිරේක දිස්ත්රික් ලේකම්, කෘෂිකර්ම පීඨාධිපති, කෘෂිකාර්මික පර්යේෂණ අංශයේ අතිරේක අධ්යක්ෂ සහ ධීවර සමිති නියෝජිතයෙකු සහභාගී වූහ.
