“එක් ත්‍යාගයක් පුද්ගලයෙකු උසස් නොකරන අතර, එක් පරාජයක් ද පුද්ගලයෙකු පහත් නොකරයි. ඔබ අත්කර ගැනීමට තීරණය කරන්නේ කුමක්ද යන්න ඔබගේ අනාගතය තීරණය කරයි. අද ත්‍යාග ලබන සිසුන් කෙරෙහි පමණක් නොව, ත්‍යාග නොලබන සිසුන් කෙරෙහිද මට සමාන විශ්වාසයක් තිබෙනවා” යැයි උතුරු පළාත් ගරු ආණ්ඩුකාරතුමා එන්. වේදනායකන් මහතා පැවසීය.
පුදුකුඩියිරුප්පු මධ්‍ය මහා විද්‍යාලයේ වාර්ෂික ත්‍යාග ප්‍රදානෝත්සවය අද (02.10.2026) සිකුරාදා පෙරවරුවේ විද්‍යාලීය ශාලාවේදී පැවැති අතර, එහි ප්‍රධාන ආරාධිත අමුත්තා ලෙස සහභාගී වූ උතුරු පළාත් ගරු ආණ්ඩුකාරතුමා එන්. වේදනායකන් මහතා සිසුන් වෙත ත්‍යාග පිරිනමමින් අදහස් දක්වමින් මේ බව පැවසීය.මෙම උත්සවයේදී සිසුන්ගේ විවිධ සංස්කෘතික හා කලා අංගයන්ද ඉදිරිපත් කෙරිණි.
දිගු ඉතිහාසයක් සහ සුවිශේෂී අධ්‍යාපනික පාරම්පරික උරුමයක් හිමි පුදුකුඩියිරුප්පු මධ්‍ය මහා විද්‍යාලය අධ්‍යාපනය, ක්‍රීඩාව, භාෂා කෞශල්‍යය, කලා ක්ෂේත්‍රය සහ විද්‍යාත්මක ක්‍රියාකාරකම් ඇතුළු විවිධ ක්ෂේත්‍රයන්හි සිසුන් ඉදිරියට ගෙන යමින් සිටින බව සඳහන් කළ ගරු ආණ්ඩුකාරතුමා, පසුගිය වසරේ අ.පො.ස. සාමාන්‍ය පෙළ විභාගයෙන් සිසුන්ගෙන් සියයට 82ක් උසස් අධ්‍යාපනය සඳහා සුදුසුකම් ලබා තිබීම එම විද්‍යාලයේ අධ්‍යාපනික මට්ටම පිළිබිඹු කරන බවද පැවසීය. විවිධ විෂය සමගාමී ක්‍රියාකාරකම්වලදීද සිසුන් කලාප, දිස්ත්‍රික්, පළාත් සහ ජාතික මට්ටමින් ජයග්‍රහණ ලබා ඇති බව සඳහන් කරමින් ඔහු ඔවුන් ඇගයීමට ලක් කළේය.
කෙසේ වෙතත්, පෙළපොත් පමණක් කියවා විභාගවලින් ඉහළ ලකුණු ලබාගැනීම පමණක් සිසුවෙකු සමාජයට අවශ්‍ය සම්පූර්ණ මිනිසෙකු බවට පත් නොකරන බව පැවසූ ආණ්ඩුකාරතුමා, සිසුන් ක්‍රීඩාවල සහ කලාවල නිරත විය යුතු බවත්, තර්ක කිරීමට ඉගෙන ගත යුතු බවත්, අන් අය හා එක්ව වැඩ කිරීමට ඉගෙන ගත යුතු බවත්, පරාජයද භාරගැනීමේ මානසික පරිනතභාවය වර්ධනය කරගත යුතු බවත් අවධාරණය කළේය. එවැනි අත්දැකීම් තුළින් නායකත්ව ගුණාංග වර්ධනය වන බවද ඔහු සඳහන් කළේය.
අනාගතයේදී වෛද්‍යවරයෙකු, ඉංජිනේරුවෙකු, ගුරුවරයෙකු, රාජ්‍ය නිලධාරියෙකු හෝ ව්‍යවසායකයෙකු ලෙස කුමන ක්ෂේත්‍රයකට පිවිසුණද, දැනුමට අමතරව මිනිසුන් මෙහෙයවීමේ හැකියාව, ධෛර්යයෙන් තීරණ ගැනීමේ හැකියාව සහ අන් අය වෙනුවෙන් සිතීමේ ආකල්පය අත්‍යවශ්‍ය බවද ආණ්ඩුකාරතුමා පැවසීය.
“ඔබ කොපමණ ඉහළට ගියද, තවත් කෙනෙකුට උපකාර කිරීමට ඔබට නොහැකි නම් එම ඉහළට යාමේ අර්ථය අඩු වේ. ඔබව නිර්මාණය කළ ගුරුවරුන්, ඔබව හදා වඩා ගත් දෙමාපියන් සහ ඔබට අවස්ථාවන් ලබා දුන් මෙම සමාජය කිසිවිටෙකත් අමතක නොකළ යුතුය. ඔබ හැදී වැඩුණු මෙම භූමියට නැවත යමක් ලබා දිය යුතුය” යැයිද ආණ්ඩුකාරතුමා අවධාරණය කළේය.
එමෙන්ම, වර්තමාන අධ්‍යාපන ප්‍රතිසංස්කරණවල අරමුණ විභාග කේන්ද්‍ර කරගත් අධ්‍යාපනයක් පමණක් නොව, දැනුම, කුසලතා, සාරධර්ම, චින්තන හැකියාව සහ ජීවිතයට අවශ්‍ය විවිධ පෞරුෂ කුසලතා ඒකාබද්ධ වූ අධ්‍යාපනයක් ලබාදීම බව සඳහන් කළ ගරු ආණ්ඩුකාරතුමා, “විභාගය සඳහා පමණක් ඉගෙන නොගන්න; ජීවිතය සඳහා ඉගෙන ගන්න” යැයි සිසුන්ගෙන් ඉල්ලා සිටියේය.
මුල්ලෙයිතීවු දිස්ත්රික්කයේ අනාගත සංවර්ධනය සඳහා ගොඩනැගිලි සහ මුදල් පමණක් ප්‍රමාණවත් නොවන බව සඳහන් කළ ආණ්ඩුකාරතුමා, එම දිස්ත්‍රික්කයට හිමි බුද්ධිමතුන්, දක්ෂයින්, නායකයින් සහ වගකීම් භාරගත හැකි නව පරපුරක් බිහි කිරීමේ අවශ්‍යතාව අවධාරණය කළේය.
මුලතිව් දිස්ත්රික්කයේ බොහෝ රාජ්‍ය ආයතනවල සහ විවිධ ක්ෂේත්‍රවල සේවය කරන සැලකිය යුතු පිරිසක් වෙනත් දිස්ත්‍රික්කවලට අයත් පුද්ගලයින් බව පෙන්වා දුන් ගරු ආණ්ඩුකාරතුමා, මෙය කිසිවෙකුට චෝදනා කිරීම සඳහා ප්‍රකාශ නොකරන බවත්, අනාගතයේදී මුලතිව් දිස්ත්‍රික්කයට අයත් පුද්ගලයින් විසින්ම තම දිස්ත්රික්කයේ රාජ්‍ය ආයතනවල වැඩි වශයෙන් වගකීම් භාරගන්නා තත්ත්වයක් නිර්මාණය වීම තම බලාපොරොත්තුව බවත් පැවසීය.
එමෙන්ම, යාපනයේ සිට උතුරු පළාතේ අනෙකුත් දිස්ත්‍රික්ක වෙත ගුරුවරුන් යැවීමේ පරිපාලන අවශ්‍යතාවක් පවතින බවද සඳහන් කළ ගරු ආණ්ඩුකාරතුමා, මෙවැනි තත්ත්වයන් වෙනස් කරමින් සෑම දිස්ත්‍රික්කයකටම අවශ්‍ය මානව සම්පත එම දිස්ත්‍රික්කය තුළම නිර්මාණය කිරීම අත්‍යවශ්‍ය බව පැවසීය.
“අද මෙහි අධ්‍යාපනය ලබන ඔබ හෙට මෙම දිස්ත්රික්කයේ ගුරුවරුන්, වෛද්‍යවරුන්, ඉංජිනේරුවන්, පරිපාලකයින් සහ නිලධාරීන් ලෙස නැවත පැමිණිය යුතුය. ‘මම නැවත මෙහි පැමිණිය යුත්තේ ඇයි?’ යන්න වෙනුවට, ‘මම නොපැමිණියහොත් කවුද පැමිණෙන්නේ?’ යනුවෙන් ඔබ ඔබගෙන්ම විමසිය යුතුයි” යැයි ගරු ආණ්ඩුකාරතුමා සිසුන්ට ඇරයුම් කළේය.
මුලතිව් යනු සම්පත් නොමැති දිස්ත්‍රික්කයක් නොවන බව සඳහන් කළ ගරු ආණ්ඩුකාරතුමා, භූමි සම්පත්, සාගර සම්පත්, කෘෂිකාර්මික සම්පත් සහ ස්වාභාවික සම්පත් මෙන්ම, ඊටත් වඩා වැදගත් ලෙස මානව සම්පත ගොඩනැගීමේ හැකියාවද මෙම දිස්ත්‍රික්කය සතු බව පැවසීය. මෙම දිස්ත්රික්කයේ අනාගතය අද මෙම උත්සවයට සහභාගී වී සිටින සිසුන්ගේ දෑත්වල පවතින බවද ඔහු සඳහන් කළේය.
ත්‍යාග ලැබූ සිසුන්ට සුබ පැතුම් එක් කළ ආණ්ඩුකාරතුමා, ත්‍යාග නොලැබූ සිසුන්ද එම විශ්වාසයෙන් යුතුව ඉදිරියට යා යුතු බව පැවසීය. වේදිකාවේදී තම නම ප්‍රකාශ නොවීම ජීවිතයේ අවසානය නොවන බවත්, එක් ජයග්‍රහණයකින් පුද්ගලයෙකු උසස් වන්නේවත්, එක් පරාජයකින් පුද්ගලයෙකු පහත වැටෙන්නේවත් නැති බවත් අවධාරණය කළේය.
“මෙම පාසල ඔබට අධ්‍යාපනය ලබා දෙයි; ගුරුවරුන් ඔබට මග පෙන්වයි; දෙමාපියන් ඔබට සහයෝගය දක්වයි. එහෙත් ඔබගේ ගමන ඔබ විසින්ම නිර්මාණය කළ යුතුයි” යැයි සිසුන් අමතා පැවසූ ආණ්ඩුකාරතුමා, අනාගතයේදී මුලතිව් දිස්ත්රික්කයේ රාජ්‍ය ආයතන, රෝහල්, පාසල් සහ සංවර්ධන ව්‍යාපෘතිවල මෙම භූමියේ දරුවන් ප්‍රධාන වගකීම් භාර ගැනීම මෙවැනි ත්‍යාග ප්‍රදානෝත්සවයක සැබෑ සාර්ථකත්වය වනු ඇති බව පැවසීය.
උත්සවයේ එක් අංගයක් ලෙස විශිෂ්ට දක්ෂතා දැක්වූ සිසුන් සඳහා ත්‍යාග ප්‍රදානය සිදු වූ අතර, උතුරු පළාත් ගරු ආණ්ඩුකාරතුමා එන්. වේදනායකන් මහතා සිසුන් වෙත ත්‍යාග පිරිනැමීය. ඉන් අනතුරුව සිසුන්ගේ කලා හැකියාවන් විදහා දැක්වීම සඳහා විවිධ කලා අංගද ඉදිරිපත් කෙරිණි.
විද්‍යාලයේ විදුහල්පති නේවිර් ජීවරාසා මහතාගේ ප්‍රධානත්වයෙන් පැවති මෙම අවස්ථාවට කලාප අධ්‍යාපන අධ්‍යක්ෂ තමිල්මාරන් මහතා, විද්‍යාලයේ ආදි ශිෂ්‍යයෙකු මෙන්ම යාපනය විශ්වවිද්‍යාලයේ වාණිජ පීඨයේ මහාචාර්යවරයෙකු වන රාජ් උමේෂ් මහතා, පුදුකුඩියිරුප්පු ප්‍රාදේශීය ලේකම් කාර්යාලයේ සහකාර ප්‍රාදේශීය ලේකම් ටෙන්සියා ගිරිදරන් මහත්මිය, නියෝජ්‍ය අධ්‍යාපන අධ්‍යක්ෂ බාලරාජ් මහතා, ගුරුවරුන්, දෙමාපියන්, සිසුන්, ආදි ශිෂ්‍යයින්, විශ්‍රාමික නියෝජ්‍ය අධ්‍යාපන අධ්‍යක්ෂවරුන් සහ විශ්‍රාමික විදුහල්පතිවරුන් ඇතුළු පිරිසක් සහභාගී වූහ.
