ගරු ජනාධිපති අනුර කුමාර දිසානායක මහතාගේ සෘජු අධීක්ෂණය යටතේ ක්රියාත්මක වන ‘පිරිසිදු ශ්රී ලංකා’ (Clean Sri Lanka) වැඩසටහන උතුරු පළාත තුළ කාර්යක්ෂමව හා සම්බන්ධීකෘතව ක්රියාත්මක කිරීම සම්බන්ධ විශේෂ සාකච්ඡාව අද (24.12.2025) බදාදා දින උතුරු පළාත් ගරු ආණ්ඩුකාර නා. වේදනායකන් මහතාගේ ප්රධානත්වයෙන් ආණ්ඩුකාර කාර්යාලයේදී පැවැත්විණි.
මෙම සාකච්ඡාවට ‘පිරිසිදු ශ්රී ලංකා’ වැඩසටහනේ පළාත් සම්බන්ධකරු සූ. කපිලන්, දිස්ත්රික් ලේකම්වරුන්, පළාත් හා දිස්ත්රික් පරිපාලන නිලධාරීන් සහ දෙපාර්තමේන්තු ප්රධානීන් ඇතුළු පිරිසක් සෘජුව හා අන්තර්ජාල මාර්ගයෙන් සහභාගී වූහ.
සාකච්ඡාව ආරම්භ කරමින් අදහස් දැක්වූ ගරු ආණ්ඩුකාරතුමා, වත්මන් වර්ෂයේදී මධ්යම හා පළාත් පරිපාලන ආයතන හරහා වෙන වෙනම වැඩසටහන් ක්රියාත්මක කර ඇති බවත්, එමඟින් එකම වැඩසටහන දෙපාර්ශ්වයම ක්රියාත්මක කරන තත්ත්වයක් උද්ගත වූ බවත් පෙන්වා දුන්නේය. එවැනි තත්ත්වයන් වලක්වා ගැනීම සඳහාත්, සම්පත් කාර්යක්ෂමව භාවිතා කිරීම සඳහාත් ඉදිරියේදී පරිපාලන දෙපාර්ශ්වයම එකට සම්බන්ධව ක්රියා කළ යුතු බව ඔහු අවධාරණය කළේය.
2026 වසර සඳහා සැලසුම් සකස් කිරීමේදී, දිස්ත්රික් ලේකම්වරුන් විසින් තම දිස්ත්රික්කයේ සියලුම රාජ්ය දෙපාර්තමේන්තු වලින් ක්රියාත්මක කළ හැකි වැඩසටහන් ලබාගෙන කඩිනමින් ඉදිරිපත් කළ යුතු බවත්, ඒ සඳහා අවශ්ය මූල්ය සහාය පළාත් සම්බන්ධකරු හරහා ඉල්ලුම් කළ හැකි බවත් ගරු ආණ්ඩුකාරතුමා උපදෙස් ලබා දුන්නේය.
ඉදිරි වර්ෂයේදී පළාත පුරා පුළුල් කළ යුතු ප්රධාන කරුණු පිළිබඳවද මෙහිදී ආණ්ඩුකාරතුමා අවධානය යොමු කළේය.
සමාජය විනාශ කරන මාරාන්තික මත්ද්රව්ය භාවිතයට එරෙහිව දැනුවත් කිරීමේ වැඩසටහන් සඳහා ප්රමුඛතාව ලබා දීම, ශිෂ්යයන් අතර මාර්ග අනතුරු සම්බන්ධ දැනුවත් කිරීම සහ ත්රිරෝද රථ රියදුරන් සඳහා පුහුණුව ලබා දීම, ශිෂ්ය නායකත්ව පුහුණු වැඩසටහන් පුළුල් කිරීම, පෙර පාසල් දරුවන් සිට සියලු දෙනාටම අපද්රව්ය වර්ගීකරණය කිරීම සම්බන්ධ පුරුදු ප්රවර්ධනය කරන දැනුවත් කිරීමේ වැඩසටහන් ක්රියාත්මක කිරීම, ජනාධිපති අරමුදලේ සේවා හා ප්රතිලාභ පිළිබඳව ජනතාවට පැහැදිලි කර ඒවා ජනතාවට ලැබෙන බව තහවුරු කිරීම යන කරුණු මෙහිදී විශේෂයෙන් සඳහන් කෙරිණි.
මෙහිදී අදහස් දැක්වූ පළාත් සම්බන්ධකරු සූ. කපිලන් මහතා, ‘පිරිසිදු ශ්රී ලංකා’ වැඩසටහන මේ වනවිට ආයතනගත කර ඇති බවත්, එය ග්රාමීය මට්ටම දක්වා රැගෙන යාම තම අරමුණ බවත් සඳහන් කළේය. අතීතයේ මුහුණ දුන් අභියෝග සැලකිල්ලට ගනිමින්, ඉදිරි වර්ෂයේදී මෙම වැඩසටහන සම්බන්ධීකෘත හා කාර්යක්ෂම ලෙස ක්රියාත්මක කිරීමට සැලසුම් කර ඇති බවද ඔහු පැවසීය.
දිස්ත්රික් හා පළාත් මට්ටමින් ක්රියාත්මක කළ වැඩසටහන් පිළිබඳවද මෙහිදී සමාලෝචනය කළ අතර, උතුරු පළාත තුළ බස් නැවතුම්පොළ 9 ක් ප්රතිසංස්කරණය කිරීම සම්බන්ධ ක්රියාකාරකම් පිළිබඳවද විස්තරාත්මකව සාකච්ඡා කෙරිණි.
තවද, මෙම වැඩසටහනේ ප්රධාන අරමුණ වන මහජන ‘හැසිරීම් වෙනස් කිරීම’ පිළිබඳවද, එය සිදුකර ගැනීම සඳහා ගත යුතු ක්රියාමාර්ග පිළිබඳවද දීර්ඝ වශයෙන් සාකච්ඡා කරන ලදී. 2026 වසර සඳහා සම්පූර්ණ කෙටුම්පත් සැලැස්මක් සකස් කිරීමෙන් පසු නැවත එක්වී අවශ්ය තීරණ ගන්නා බවටද මෙහිදී එකඟතාවයකට පැමිණිණි.
