‘முல்கோ’ விற்பனை நிலையத்தை கூட்டுறவுத்துறை பிரதி அமைச்சருடன் இணைந்து ஆளுநர் அவர்கள் இதனைத் திறந்து வைத்தார்.

வடக்கில் வளமுள்ள மாவட்டம் முல்லைத்தீவு. ஆனால் வறுமையிலும் இந்த மாவட்டம் முன்னிலையில் இருக்கின்றது. இந்த அரசாங்கத்தின் காலத்தில் இந்த நிலைமை நிச்சயம் மாற்றப்படும். இவ்வாறு நம்பிக்கை வெளியிட்டார் வடக்கு மாகாண கௌரவ ஆளுநர் நா.வேதநாயகன் அவரகள்.

முல்லைத்தீவு மாவட்டத்தின் கரைதுறைபற்று கால்நடை வளர்ப்போர் கூட்டுறவு சங்கத்தின் ‘முல்கோ’ விற்பனை நிலையத்தை இன்று வெள்ளிக்கிழமை காலை (29.08.2025) திறந்து வைக்கப்பட்டது.

கூட்டுறவுத்துறை கௌரவ பிரதி அமைச்சர் உபாலி சமரசிங்கவுடன் இணைந்து வடக்கு மாகாண ஆளுநர் அவர்கள் இதனைத் திறந்து வைத்தார்.

இந்த நிகழ்வில் உரையாற்றிய பிரதி அமைச்சர், போர் உள்ளிட்ட பல்வேறு காரணிகளால் கடுமையாகப் பாதிக்கப்பட்ட மாவட்டம் முல்லைத்தீவு. எமது அரசாங்கத்தின் காலத்தில் இந்த மாவட்டத்துக்கு முக்கியத்துவம் கொடுத்து அபிவிருத்திப் பணிகள் முன்னெடுக்கப்படும். தெற்கின் கூட்டுறவுத்துறையை விட வடக்கின் கூட்டுறவுத்துறை எப்போதும் முன்னிலையில் இருக்கின்றது. அதேநேரம் எமது அரசாங்கம் மக்களின் நம்பிக்கையை ஒருபோதும் வீணடிக்காது, என்றார்.

இதனைத் தொடர்ந்து உரையாற்றிய வடக்கு மாகாண ஆளுநர், நான் மாவட்டச் செயலராக முல்லைத்தீவு மாவட்டத்திலிருந்தபோது இங்குள்ள கூட்டுறவுச் சங்கங்களுக்கு பல மில்லியன் ரூபா பெறுமதியான உபகரணங்களைப் பெற்றுக்கொடுத்திருந்தேன். ஆனால் தவறான முகாமைத்துவம் காரணமாக அவை உரியவகையில் பயன்படுத்தப்பட்டிருக்கவில்லை. இது மிகவும் கவலையை ஏற்படுத்தியது. ஆனால் தற்போது அவற்றில் சிலவற்றை மீள இயக்குவதற்கு நடவடிக்கை எடுக்கப்பட்டுள்ளது. இந்த மாவட்டத்தின் வளங்களை நாங்கள் தவறான முகாமைத்துவமின்றி முழுமையாகப் பயன்படுத்தினால் முன்னுக்கு வரமுடியும். எங்கால் முடியாததென்று எதுவுமில்லை. எமது மக்களுக்கு தங்களது வருமானம் அதிகரிக்க வேண்டும் என்பதும் வேலை வாய்ப்பு கிடைக்க வேண்டும் என்பதும் மிகப்பெரிய எதிர்பார்ப்பாக இருக்கின்றது.

இன்று இந்த முல்கோ திறந்து வைக்கப்பட்டுள்ளது. இதை நீங்கள் விரிவாக்க வேண்டும். தனியாருடன் போட்டியிட வேண்டும். நீங்கள் சிறந்து முன்னேற வேண்டும் என வாழ்த்துகின்றேன், என்றார்.

பன்முகப்படுத்தப்பட்ட நிதியில் ரூபா ஒரு மில்லியனும், கூட்டுறவுச் சங்கத்தால் ரூபா ஒரு மில்லியனுக்கும் அதிகமான நிதியும் செலவு செய்யப்பட்டே இந்த நிலையம் அமைக்கப்பட்டுள்ளது.

இந்த நிகழ்வில் கௌரவ நாடாளுமன்ற உறுப்பினர்களான ம.ஜெகதீஸ்வரன், க.திலகநாதன், து.ரவிகரன் ஆகியோரும், முல்லைத்தீவு மாவட்டச் செயலர், மேலதிக மாவட்டச் செயலர், கரைதுறைபற்று பிரதேச செயலர், மாவட்ட கூட்டுறவு உதவி ஆணையாளர் ஆகியோரும் கலந்துகொண்டனர்.